Personalment, naħseb li l-poeżija hi waħda mil-aħjar mezzi biex tesprimi ruħek. Bil-ftit li naf, iddeċidejt li nikteb poeżija bil-Malti għal Malta.
minn Matthew Darmanin
Immaġni minn Isles of the Left
b’qalbi sewda rsaqt ‘l hawn
biex insellimlek o art twelidi
qalb iċ-ċitru u l-fjuri mitbiela
gharkuptejja b’demmek f’idi
x’għamilt b’idejja, o Malta tiegħi?
għaliex ġibtek duħħan w’irmied?
it-tweġiba f’qalbi nafha
ir-risposta m’hi xejn ħlief skiet
art pura għaffiġna u żverġnajna
flokha tfajna briks u konkrit
qlajna ruħ u poġġejna magna
u ta’ ġismek ma bqajtx sid
il-marda qerditek u qatlitek
u t-tbatija ma kinitx ftit
bħal Pilatu ħaslu idejhom
dawk maqfula ma’ partit
protesti u għajjat saru
u t-tama bdiet terġa tfeġġ
kollox waqa fuq widnejn torox
u kompla jseħħ is-sagrileġġ
partatnik ma’ borża fidda
biegħna ismek lil briganti
minn gżira żgħira u sabiħa
spiċċajt stat insinjifikanti
mhux għaliex ma bqajtx tissemma
anzi għax issemmejt wisq
bil-ħażen u l-korruzzjoni
ħadd ma xtaqlek aktar risq
funeral jaf ma kellekx
iżda fuq spallitna rfajnik
dawk li semmajna leħinna
li ssilitna kontra t-tifrik
il-kbarat għażlu li jsikktuna
sabiex bwiethom baqa’ jitqal
qatlu l-passat għal preżent
ma ħallewx futur għalina t-tfal
għalkemm tajtek nifsi u demmi
ta’ mewtek xorta għandi ħtija
jaf m’għamiltx il-ġerħa qattiela
madanakollu jisgħobbija
se jkolli nitlaq għażiża Malta
għax il-ħin qed jagħfas sew
sejjer naħdem għal min qatlek
għal dawk li kissruk u nsew
naf li hekk nidher ġakbin
wara li għidt li lilek ngħożż
imma biex ngħajjex lil familti
spiċċajt ngħix f’dal-paradoss
kemm nixtieq noħloq xi ħaġa
li ż-żmien tista’ treġġa lura
biex mil-qiegħ nerġa ngħollik
narak tinbet bħall-isbaħ fjura
fil-passat inħalli ittra
lil dawk li jistgħu jsalvawk
forsi minn dan il-Kalvarju
jirnexxielhom jiskansawk
Prosit Matthew, bicca kitba tajba!
Grazzi!